සබඳ සරසවිය

නිදහසේ ඉගිලෙන්න 
බර උනත් තටු දුන්න
බෝ දේ කියා දුන්න
සොඳුරු සරසවි වරම

දැනුම මිණි පහනක්ය
මිතුරුකම් සවියක්ය
දහඩියම සුවඳක්ය
ඔබ කියා දුන් සත්‍ය

ගී කීව අප නැටුව
දෝතින්ම හඬ තැලුව
මිහිර හද රස ගෑව
නැතුවාට සෘති තාල

ජය ගොසම රැව් දුන්න
උරෙනුර හැපී ගැටුන
කෙළි මඬල තනි වෙයිද
සෙල්ලමට අප නැතිව

සුදුද කළු අළු චරිත
අඩු වැඩිව අප තුළම
වෙසෙනයුරු පසක් කළ
අපූරුම රඟ මඩල

උදෑසන අරුණැල්ල
විඩාබර සැඩ අව්ව
සඳේ මුදු හසරැල්ල
ඔබ සමඟ මා වින්ද

සබඳ මා සරසවිය
බසින මේ හිරු එළිය
මට කියන පණිවිඩය
සමුගැන්ම ළඟ බවය