සිතක උදෑසන

image-from

                                             තුරු හිසෙක පැළඳි ලා දළු වලින් පෙරී බිම    වැටිලා
                                             උරා බිඳු තුසර මල් කැකුළු විකසිත කරන       සිඹලා
                                             පවා දිනකර වෙනස් වන අයුරු යද්දි කල්    ගෙවිලා
                                             නැඟී අහසට චණ්ඩ හිරු රැසින් ඒ මල ම         දවලා

                                             පඬු පාට සිවුර ලා සන්සුන්ව බොහෝ දේ    හැරලා
                                             පොඩි සාදු ගෙයින් ගෙට පිඬු සිඟා වඩිනවා  දැකලා
                                             අහනවා කවුද රහසින් කොහිද දුවන්නේ      නුඹලා
                                             මමය මාගේ කියා බොහෝ දේ හිතේ පොදි බැඳලා

                                             රිය සකට කලබල ව උඩ නැඟෙන දූවිල්ල   වැදිලා
                                             වැට ගාව වතුසුද්ද ගහේ මල් කිලිටි වෙයි     කියලා
                                             බිම තවන අයුරින්ම සිසිල් දිය දොරකඩට    ඉහලා
                                             රැකුම බෝසත් මඟයි සිත් මල කෙලෙස් දූලි නිවලා

සුරඟන ටැටූ

image-from

දේදුනු පාටින් නෙක හැඩැති

සුරඟන රූ සායම් ගතෙහි

සිතුවම් ලා ගන්නට සිත් වී

සුරඟනකම ඇවිදින් සිතුනී

සායම් වගුරන ඇල්පෙනෙති

මුදු මල් පෙති හාරන විටදී

නා දළු මුතු කැට මැද සිරවී

දෑස පියාගෙන ඉන්න හැටී

කෙහෙරැළි අතැඟිලි සමඟ වෙලී

සිතුවම මත දඟ කරන හැටී

ඔබ නොදනී දොඩමළු කිරිලී

මුදු පහසකි ගීයකි මිහිරී

මා ඇඳි සිතුවම ඈ ගතෙහී

ඈ ඇඳි සිතුවම මා හදෙහී

තබා ඇදී යයි ඈ නික්මී

ටැටූ හිතේ ඇඳි කැවෙයි කිතී

නැඟී අසෙකු මත්තේ හාලී

අසරු උරෙහි සුවසේ එල්ලී

ඇගේ ලොවට යද්දී ඉගිලී

බලා හිඳිමි ගුලිකර සල්ලී

හෙලෝ

image-from

                                      හෙලෝ අම්මෙ කොහොමද දැන් සනීප හෙම    ඔයාට
                                      මෙහෙට වැස්ස හරි හරියට කොහොමද දැන්   ඔහේට
                                      තාත්තාට කියන්න ඔය යන්න එපා            තෙමෙන්න
                                      පහළ ගෙදර නැන්ද එනව නේද උදව්             කරන්න

                                           අපි නං ඔය වෙනද වගේ ඉන්නව ඔහෙ            බලාන
                                           කොහොමද දුව මහත්තයට අදත් වැඩද              එයාට
                                           දකින්නටත් ආසයි දැන් මගෙ පොඩි            මුණුබුරාව
                                           මේ ඇහුනද එන්න ටිකක් දූ අහනව                  ඔහේව

                                                අවුරුද්දට පස්සෙ තාම දැක්කෙ නෑනෙ           බොලාව
                                                එන්නට මේ පැත්තෙ බොහොම අඩුයි වගේ     වෙලාව
                                                පුංචි පුතා ළඟ පාතක ඉන්නවාද                        බලාන
                                                දෙන්න ටිකක් ටෙලිපෝනය දොඩන්න මං         එයාට

                                                      අනේ සීයෙ ගමට එන්න මං ඉන්නව                බලාන
                                                      ෆොන් එකයි අපේ ගමන් අඩු කළ               කාරණාව
                                                      අම්මට නෑ ඇහෙන්නෙ මං මේ කියනා              කතාව
                                                      ටික දවසක් ටෙලිෆෝනය ගලවාලා                තියන්න

සබඳ සරසවිය

නිදහසේ ඉගිලෙන්න 
බර උනත් තටු දුන්න
බෝ දේ කියා දුන්න
සොඳුරු සරසවි වරම

දැනුම මිණි පහනක්ය
මිතුරුකම් සවියක්ය
දහඩියම සුවඳක්ය
ඔබ කියා දුන් සත්‍ය

ගී කීව අප නැටුව
දෝතින්ම හඬ තැලුව
මිහිර හද රස ගෑව
නැතුවාට සෘති තාල

ජය ගොසම රැව් දුන්න
උරෙනුර හැපී ගැටුන
කෙළි මඬල තනි වෙයිද
සෙල්ලමට අප නැතිව

සුදුද කළු අළු චරිත
අඩු වැඩිව අප තුළම
වෙසෙනයුරු පසක් කළ
අපූරුම රඟ මඩල

උදෑසන අරුණැල්ල
විඩාබර සැඩ අව්ව
සඳේ මුදු හසරැල්ල
ඔබ සමඟ මා වින්ද

සබඳ මා සරසවිය
බසින මේ හිරු එළිය
මට කියන පණිවිඩය
සමුගැන්ම ළඟ බවය