Sunday, November 2, 2014

අහිමි

image-from

හාත්පස ඝන අඳුර වපුරා
වැටෙන වැහි කාලයක් තිස්සේ
දරා ගන්නට නොහැකි මොහොතේ
ගලා යන ලෙස ඉවුරු බිඳගෙන
ළයේ මා හිස හොවා කඳුළින්
දොවාලයි හදවත රිදුම් දෙන

ඉතාමත් දුර ඈත අහසට
යොමා දෑසම බලාගෙන නුඹ
හිඳිද්දී සිර ගත විලාසෙන්
කිරිල්ලියෙ කෙලෙසක දරන්නද

නුඹේ ප්‍රේමය දරා ගන්නට
මගේ හදවත කුඩා වැඩි බව
පසක් කළ  ගෙවුණු කාලය
අතරමග මඟ හැරුණු ආලය


පසුබිම : අග පිපි මල් නවකතාව (සුමිත්‍රා රාහුබද්ධ ), එහිම නාට්‍ය තේමා ගීතය

Wednesday, July 23, 2014

උයන

image-from

හිතට හිතෙන හඬ අහන්න මල් නොපිපෙන උයනේ
කටු වලටත් නොරිදෙන්නට පය තියන්න අකුලේ
මිහිදන් කල පෙමක පුරා වත කියන්න රහසේ
හිතං උන්නේ නුඹ ගියාද මටත් නොකිය අඳුරේ

පොදක් විඩා නිවා ගන්න අතර මඟදි රැඳුණා
උණත් නුඹට කටු අකුලේ මලක් වෙන්න තිබුණා

අවන්හලත් නිදි වැදුණා සඳ මුදුනට ආවා
මලක් මඟදි මුණ ගැසුණා නුඹද කියා සිතුණා

Wednesday, February 26, 2014

ගඟක් ගලයි



image-from

සීත හිම දිය වෙනව
වසන්තය ළඟ එනව
මිදුණු ගං දිය උඩට
ඉර වැටිල දිලිසෙනව

කාට ලස්සන උණත්
ගඟක් කැමතියි හුඟක්
නිහඬවම නිසසලව
මිදිල ඉන්නට තවත්

මෙය ප්‍රථම වසන්තය
නොවේ ගඟ පසු කරන
දන්න හින්දා ගැහැට
කෙඳිරි ගාමින් ගලන

අගක අතු ගඟට බර
මලක් ළඟ නවතීද
වසන්තය උදාවන
වළක්වනු හැකිවේද

මුහුද හමුවෙයි ගඟට
යළිත් නිසසල වෙන්ට
තවත් ගංගා වැටුණ
හැකිද තරහා වෙන්ට

Thursday, January 30, 2014

ග්‍රීන් පාත්

image-from

                                               පින්තාරු කළ සිහින වෙන්දේසියේ ඉමක
                                               නැවුම් සායම් සුවඳ නො එනා
                                               පොදු නොවන සිහිනයක් නොවිකිණෙන සිත්තමක්
                                               ළඟ හිඳී ඇය නතර වීලා

                                               ටිකක් ඉස්සර ඇන්ද නමුත් උණුසුම් තවම
                                               නුඹේ කොපුලේ පාට හින්දා
                                               අදත් තරුණයි තාම හෙටක් සොයමින් පලා
                                               ඇයිද නුඹ ගියෙ අනේ මන්දා

                                               එදා වාගේ හෙවන නොමැත මේ මඟ දෙපස
                                               පාර්ක් එකටත් එළිය වැටිලා
                                               අවන්හල මී පුරන ළඟ පමණි ටිකක්වත්
                                               හෙවන ඇත්තේ ඉතිරි වීලා

                                               ශේෂ වූ හසරැල්ල සුසුමකින් නොතවන්න
                                               වසන්තය නිමවී හමාරයි
                                               ඇන්ඳ මුත් කඳුලකින් දියකර මනෙත නැඟුණ
                                               ගෙනයන්න මෙහි වර්ණ නුඹගෙයි

Related Posts Plugin for WordPress, Blogger...