Thursday, December 27, 2012

මල් වත්ත


                                                               ගසින් වෙන් වූ කැකුළු
                                                               පිපෙන මල් වත්තයි
                                                               කිරි සිනා හා කඳුළු                                                                
                                                               සමඟ මල් සුවඳයි

                                                               දෙවෙනි මව් තුරුල්ලේ
                                                               අකුරු ඇහිඳින කැකුළු
                                                               පසිඳලන්නට අරුත
                                                               වදන සෙනෙහස කියන

                                                               ජීවිතය ගමනක්                                                                
                                                               ආදරය උලෙළක්
                                                               ළපටි සිත් මල් වලට
                                                               සිහින් පොද වැස්සක්
                                                                                 
                                                               අරලියා මල් පාර
                                                               පියමං කරං ආපු
                                                               ආදරේ දුන් යාළු                                                                
                                                               හුඟක් ඉන්නට ඇතී

                                                               හිනාවෙන ඇස් කියන
                                                               සතුට පිළිබඳ වැකිය
                                                               ආදරය ප්‍රස්තුතය
                                                               හෙට අනියමාර්ථය

                                                               අපෙක්ෂාවේ දූලි
                                                               ඉතා පොඩියට රැඳුණු
                                                               උපෙක්ෂාවේ කැකුළු
                                                               අරලියා බිම වැටුණු

Sunday, December 2, 2012

හැන්දෑව

image-from

                                                        රතු පාට දුර අහස  පාට නුඹෙ දෑස
                                                        වැහිබරයි සැඳෑ අහසට වඩා
                                                        සැන්දෑ සුළං සීත නිහඬයි නුඹේ වචන
                                                        සුළඟ හෙමි හෙමින් ඉකි බිඳිනවා

                                                        වසන්තය දුර ඈත නොවේ නුදුරේ නේද
                                                        හොවා තුරුලේ රෝස මලේ සිහිනේ දෑස
                                                        දකින්නේ අපේ මල් උයනදෝ
                                                        වැටෙන්නේ තුටු කඳුළු බිංදු දෝ

                                                        මලානික හැන්දෑව කොහේ යන්නද තාම
                                                        බොහෝ කලකට නුඹව හමුවන්න බැහැ අපට
                                                        දවසකට වඩා සඳ කෙසේදෝ
                                                        නෑවිදින් අහසට හිඳින්නේ

Friday, October 12, 2012

කඳවුර

image-from

දුමාරේ 
අඳුරුයි දැන් බෝම 
මේ ජීවිතේ 
අවාරේ 
හුරු වෙච්ච පුරුදූ 
නිස්කාරනේ

රිදුම් දේ
සුසුම් බර වැඩි වී 
පිරි මා ළයේ
පෙනෙන්නේ
කඳුළු බිඳු දෑසේ 
අම්මේ නුඹේ

පිපෙන්නේ 
කවදාද ආයේ 
මල් මාවතේ
දවන්නේ 
නෑමයි ආවොතින් 
යළි වසන්තේ


Saturday, September 29, 2012

ස්ටෙන්සිල්


image-from

නිහඬ බව ඇහෙනවා හුදෙකලා අඳුරින්
සුසුම් දැන් නිවනවා කඳුළු බිඳු නෙතඟින්

පිටුපෑව මා හා තනිය දැන් තරහයි 
නිතර තරහද ඇසූ නුඹ නිසා හුරතල්

හිත හිස්ම මොහොතේ සුළඟින්ද ගැස්සෙයි
හිස් කමත් නුඹ වගේ හිතක් කළ ස්ටෙන්සිල්

මගෙ හිතම දොඩවයි නුඹෙ හඬම රැවුදෙයි
සිහින සිත රවටයි තටුවකින් සමනල්


Monday, September 17, 2012

විශේෂ ඔහු

image-from

                                                                 සතුටට හිනැහෙන 
                                                                 දුකට හඬන                                                                             
                                                                 කෝපයට රවන
                                                                 අවංක ඔහු

                                                                 ඔය හැම දැනෙන
                                                                 අවස්ථාවට අනුව 
                                                                 හිතන මතන   
                                                                 රඟන මම
                                                                                                                                                        
                                                                 දැනුම හා අවබෝධය
                                                                 ගෙත්තම් කළ කබාය
                                                                 පොරවාන මම  
                                                                 රැවටීමෙන් රැකෙන
                                                                
                                                                 අඩුලුහුඬුකම් හිඟ
                                                                 මහඟු මිනිසා මි මම
                                                                 හිනැහෙන අඬන රවන 
                                                                 කබායක් අහිමි ඔහු
                                                                 
                                                                 සත්‍යයේ දාහයට
                                                                 නැඟෙන දහඩියව
                                                                 හෘද සාක්ෂියට
                                                                 පිටවෙන්න නොදෙන

                                                                 කබායක් හිමි මම

Sunday, September 9, 2012

අවසන් වසර

image-from

මට ඇහෙන එකම හඬ
සර සර වැස්ස වැටෙන හඬ
නුඹ සිනා සලන හඬ
මා හා කතා කරන හඬ

තුරු ලතා මඬුලු යට 
අපටත් ඉඩක් තියාගෙන
මේ වගේ වැස්ස වට 
ඉස්සර මහේ බිනර දින

නුහුරු එදා මට 
නුඹගේ ගමන හෙමින් යන
නිය තුඩින් අනින කොට
පමාව ගැන මට බැන බැන

කුඩේ අරන් මම 
බෝඩිම ගාවට එන්නද 
වැටිලා ඇති වැස්සට
එනවද මල් ඇහිඳින්නට

Saturday, September 8, 2012

චියර් එක

image-from

ශක්තිය ජවය ගැටෙනා
සිනහව කඳුළ සරනා
ඔල්වර සද්දෙ නැඟෙනා
පිටියම නුඹට ඇරුණා

ගිනියම් ගතෙහි දිලෙනා දහඩියෙන් 
උණුසුම් පැතුම් එළිවේ වීරියෙන්
අවු වැසි උනත් පරදී ලඟ දනින් 
ජවයට ගැටෙන පිටියේ උරෙනුරින් 

කඳු හෙල් පිරුණු ගමනේ ඔය නෙතින් 
උණුසුම් කඳුළු සඟවා හිනැහියන් 
දවසක් එනව සත්තයි දිරි ගනින් 
ජය ටැඹ ළඟදි කඳුළට ඉඩ දියන්

ජයග්‍රහණයක සිහින දකින සියලුම ක්‍රීඩකයන්ට

Friday, August 24, 2012

දෙක

image-from


රාමුවට පින්තූර ගැනීම
පින්තූර රාමු කිරීම
රාමු කළ පින්තූර ගැනීම
පින්තූර ගැනීම
හා
රාමු කිරීම

Wednesday, August 22, 2012

බලාපොරොත්තු

image-from

                                                          මවුගෙ කිරි දරුවන්ට    වෙච්චී
                                                          ඇයිද එහෙනම් මේ       තහංචී

Sunday, August 19, 2012

සිහිනය

image-from

බලාපොරොත්තුවෙ සඳ මත
බරක් නොදැනෙන සිතක් ඇවිදින
නින්ද ලඟ නැති මොහොතක
පියවි නෙතදර ඇඳෙන සිහිනය

බලා ඉන්නේ කොහෙදැයි
බලා ඉන්නේ කවුදැයි
සිනාසෙන්නේ ඇයිදැයි 
උත්තර නොදත් සිහිනය

ආදරණීය විදිහට
ලද ජීවිතය දිස්වන
දුකත් ඉකි ගස්සන
මගේ සිහිනය ලස්සන

කොහොම හොරු ගන්නද
මගෙන් හංගන්නද
ගෙට අරං නැහැ මං 
මගේ ප්‍රීතිය මගේ සිහිනය

Sunday, August 5, 2012

අඳුර

image - Udara n Suri

                                                      සුසුම් දිගේ ළයට වඩින සීතල සුළඟ
                                                      සුවඳ නුඹේ ගෙන ඈතට යන්නට හදන
                                                      යහන් තලේ පැතිරෙන ඒ වත්සුණු සුවඳ
                                                      අඳුර ගෙනේ මා හට අඳුරට අත වනන

                                                      සඳළුතලේ පාමුල නිම්නයෙ දුර පෙනෙන
                                                      නුවර දිලේ අඳුරේ කඳු අතරේ තවම
                                                      මතට නිවේ නෙතු නිදිබර නැතිමුත් තවම
                                                      අඳුර පෙනේ නොපෙනේ ළඟ පාතක එළිය

                                                      ආදරයට පාර කියා දුන් වැව රවුම
                                                      ඇයිද බලා හිටියේ අප යන තෙක් දෙපස
                                                      කඳුළු නුඹේ ගිලගත් රුදු වැව් දිය නිහඬ
                                                      එහෙව් වැවට තාමත් හඳ පායයි සොඳුර

Sunday, July 15, 2012

දොයි දොයි දොයි


image-from


                                                        ඉර ගිලිලා සඳ                   එනවා
                                                        වැඩ නිමවී මම                  එනවා
                                                        මවු නුඹගේ             හිනැහෙනවා
                                                        නුඹ නිදි බව                 පවසනවා

                                                        අද ඉරිදා වැඩ                  නැතුවා
                                                        පුතු මා හා              නැළැවෙනවා
                                                        පුතුගෙ බසින්            තෙපළනවා
                                                        එබස මටත්                තේරෙනවා

                                                        සඳ එනවා රෑ                  වෙනවා
                                                        ඉරිදාවල් කෙටි              වෙනවා
                                                        සඳ තුරුළේ            හිනැහෙනවා
                                                        පුතු නාඬා                   නිදියනවා

Friday, June 22, 2012

හයිය

image-from

යකඩ කම්බියක් 
උනත් 
නමනකොට නමනකොට 
කැඩෙනව.

Friday, June 15, 2012

කටුගේ


image-from


සිහිනය සොයා 
දෑසම වසා
ගියදා පාළුවේ

මුදු සුවඳ ලා
හිත ළඟ ගයා
පිපිලා මාවතේ

රහසක ලියා 
පතුලේ නොලා
සඟවා සාගරේ

අහසක ලියා 
ඒ මල තෙමා 
වැස්සා ආදරේ

විස කටු නෙළා
මල් ඉවතලා
තනලා මාළිගේ

හද එහි හොවා 
මතකය මරා 
වලළා පාදමේ

කඳු හෙල් පවා
සසලව බලා 
සිටියා සීතලේ

ඔබගෙන් පලා 
යන මා දිහා
අවුලා ආදරේ

සඳ රෑ පුරා 
ඉවසා බලා 
සිටියා මා කෙරේ

සඳ බැස ගියා 
උදයේ පවා 
අඳුරුයි මාළිගේ

Saturday, June 2, 2012

පහන

image-from

රන්වන් පාටින් දැල්වී
ආලෝකය දී පිච්චී
රත්ව දැවී තෙල් කළුවී
සියල්ල මා හට දන් දී

ජීවිතයේ කළු අඳුරු පැයේ
ආලෝකය දුන් පහන රැයේ

අරුණාලෝකය හමුවී
අඳුරේදී පෙර නොදිටී
පෙනෙනා ලොව තුළ කැළඹී
ඇත දෑසම ගිනි කණවී

ජීවිතයේ කළු අඳුරු පැයේ
ආලෝකය දුන් පහන රැයේ

පෙනෙනා දේ අඳුරේදී
වටිනා ආලෝකයකි
දිලිසෙන දේ ලඟ නොපෙනී
ඇත නිහඬව එළියේදී

පිදුම 
අම්මාට

Friday, May 18, 2012

කන්ද නැඟීම


image-from
                                             
                                                දෙපා මඩ වැකුණු ගල් ඇනී දැන්   රිදෙනා
                                                මඟෙහි දුෂ්කර විටෙක මල් පෙතිද තිබුණා
                                                අත්ල මත දිය බුබුළු රැඳි බරට      නැඟුනා
                                                මැදී ගස් අතු සමඟ ඉරී සම           ඇරුනා

                                                               තැනිතලාවයි        නිවන
                                                               දාහය ගතේ           ගිමන
                                                               සීතල සුළං            හමන
                                                               වැතිරී සුවෙන්       සිටින

                                                බියෙන් පය ලිස්සාද හදින් පෙර ගැහෙනා
                                                දුටුවෙ බෑවුම පමණි ලිහී ගල්       වැටෙනා
                                                මුදා බිය වැතිර සිටිනා විටදි       පෙනෙනා
                                                උසයි තව කන්ද හිස වළාවෙන්     වැසුනා

                                                               රුධිරය ගතේ          නිවුන
                                                               මිදී සීතෙන්             හමන
                                                               හැක හුස්ම        නවතින්න
                                                               යළි නැඟුම නිම නොවෙන

Tuesday, May 1, 2012

විරසකය

image-from


                                                 හිරු දියේ ගිලී සමුදුර එහි පැහැය        ගනී
                                                 කරදියෙන් තෙමී හිරිපොද ඇවිත් වත  සිඹී
                                                 නැඟී සඳ නැතී තරු මා හා        සිනාසෙතී
                                                 මුවාවට යමී ඉස්ටේසමට වැසි             වසී

                                                 රළ සමඟ හැපී වෙරළේ මතක පිය     මනී
                                                 මළ බැඳුණු පීලි මත දම් පාට මල්         පිපී
                                                 ඇගේ හිස පැළැන්දූ මල් සමය සිහි   වෙතී
                                                 අදත් ඇති පිපී අඳුරට පෙනෙන්නේ   නැතී

                                                සිහින කැබලිතී දුම් රිය හඬින්      ඉහිරෙතී
                                                වැස්ස නොම දෙතී ඉඩ තව පමාවට  මෙහී
                                                කළුව පමණකී අහසේ වලාකුළු           පිරී
                                                දෑස ලත වෙතී සිත ගතු කියයි ඇය      සිටී

Thursday, April 26, 2012

සුමට

image-from


බිත්තියේ කඩතොලු වසා
කිරි පාට පොටි හැන්දක උලා
ගෙදර හිඟකම් හිත හිතා
කණ පාට පැල්ලම් යට කළා

කොලේ වැල්ලෙන් හීරිලා
සමතලා වෙන බිත්තිය බලා
දූලි දුම් සුසුමන් හෙළා
සමසමාජය සිහිපත් කළා

දූගෙ කම්මුල් පැහැ මවා
ලා රෝස සායම් තැවරිලා
පිට හීන මන්දිර හැඩ වෙලා
ණය කාසි ළඟ අසරණ වෙලා



පොටි - බිත්ති සුමට කිරීම සඳහා භාවිතා වන බදාම විශේෂයකි

Thursday, April 19, 2012

බොර වතුර

image-from
                                                        
                                                        නිසසල දියේ තුරු සිරසේ        ජායාව
                                                        සරතැස නිවේ ඇය පාමුල      හේඩාව
                                                        සුවඳට මලේ සිත නිවෙනා     සේයාව
                                                        සුළඟට දියේ මල් වැටෙනා    වේලාව

                                                        කළුවර වෙලා මුළු අහසම      ගුගුලාම
                                                        වියරුව මහා වැසි දිය මත    වැටුණාම
                                                        පතුලද විලේ කැළඹෙයි මඩ     දුටුවාද
                                                        චංචල දියේ නොගැඹුරු බව  දැනුනාද

                                                        වැස්සට දියේ එකිනෙක මල් ගිලුණාට
                                                        හිරිකඩ හිතේ සුන්දර තැන්  තෙමුවාට
                                                        කැඩපත දියේ විසිරුන රුව   මැකුවාට
                                                        ඉඳහිට වැටේ පත් අග රැඳි පිනි    දියට

Related Posts Plugin for WordPress, Blogger...