Friday, September 30, 2011

මද නල

image-from


මා වටා වා තලේ 
පීඩනය අඩු වත්ම
මා කරා හමා එන 
මද නලේ

මේ රැයෙ පවා ගත
වැගිරෙනා ඩා බිංදු
සිප ඔබේ මුදු පහස
 තවරණා

කවුළු දොර ඔබ නිසා
රෑ පවා මේ අඳුරු
අවදියෙන් ඇහැ ඇරන්
ඉන්නවා

සමඟින්  යහනේ නිදන්න
සෙමින් කුටියට ඇදී එන්න

බෝතලේ මාළුවා

image-from

                                              උදේ ඉඳන් රෑ වෙනකම් මේ                   රවුමේ
                                              පීනනවා තාමත් මම එක                        පිම්මේ
                                              ලෝකය නුඹේ එපිටින් වීදුරු                බැම්මේ
                                              විනොදයි හරිම මේකද මගෙ                 කරුමේ


                                                            වතුර අස් කරල පිරිසිඳුවට                     ඇත්නම්
                                                            කෑම නොසොයාම වේලාවට                 එයි නම්
                                                            වැඩපල කරන්නට වෙහෙසෙන්නට      නැත්නම්
                                                            වෙන සැප කොහිද ඔය වගෙ ඉන්නට    ඇත්නම්


                                              ඇළ දොළ තියෙනවලු ගහ කොළ දිය   පිරුණු
                                              දැක නැති උණත් හද වරුනාවට            පිරුණු
                                              තැනකට මා වැනිම තව අය හට           ඇරුණු
                                              යන්නට මටත් ආසයි ළමයෝ               කුළුණු


                                                             ඇළක දොළක නුඹ ගෙනිහින්        දැම්මොතින්
                                                             විසකුරු මාළු ඇවිදින් යයි නුඹව               අරන්
                                                             අහසින් උණත් එන්නට හැක නපුරු        සතුන්
                                                             නුඹව ගිලින්නට පුළුවන් එකම                කටින්


                                              අනේ ඉතින් තව උන් එහි ඇතිනෙ        තුටින්
                                              ඔය දෙවල් වලට දිරියෙන් මුහුණ        දෙමින්
                                              මට සුර සැපයි සමඟින් මා වැනිම         මසුන්
                                              නුඹටත් දැනේ වී තනිවු දිනක               තදින්


‍යි.


photo-from


                                                        කයි බොයි නටයි                ගයයි
                                                        හැපෙයි වැලපෙයි        හිනාවෙයි
                                                        සිතයි කයයි                  වචනයයි
                                                        ඉන්නකං මේ හැම              කරයි


                                                        අන්තිමේ කවුරුත්            මැරෙයි
                                                        සමහරු සුගතියට                   යයි
                                                        තවත් සමහරු අයෙ                එයි
                                                        නො එන අය නැතුවාම නොවෙයි


                                                        නොහොබි දේ කල             අයයි
                                                        මුවින් ගිනි දුන්                     අයයි
                                                        නපුරු සිත් ඇති                   අයයි
                                                        අවසානෙ යන්නෙ            දුකටයි


                                                        සියල්ල                        අනියතයි

                                                         තණ්හාව එනිසා                 දුකයි
                                                        නැවතීම නම්                     සැපයි

                                                        යා යුතුම තැන                නිවනයි

අදහස : මා උගත් බුදු දහම ඇසුරින්


Sunday, September 25, 2011

බිහිරි

source

                                                                මිහිරි ගී රස
                                                                මට කියන්නේ නෙතක්

                                                                විඳින කෙනෙකුගෙ ගීය

                                                                මළගමක වැලපිල්ල

                                                                මට කියන්නේ පොදක්
                                                                කඳුළු නෙතකින් වැටුණ


                                                                පිළුණු රළු වදන් 

                                                                මට කියන්නේ රතක්
                                                                වෙළුම් පටියක රැඳුන


                                                                දෝතින්ම තදින්

                                                                වසා දෙසවන්

                                                                අහන්න


                                                                මට ඇසුණ නැළවිල්ල
                                                                හිත රිදවු වැලපිල්ල
                                                                පෙම්බරම මිමිණිල්ල


                                                                මගෙ ලෝකෙ හඬ


Wednesday, September 21, 2011

රොඩ්ඩ

source


ඇසිපිය හෙළනා මොහොතක 
සැණෙකින් ළංවී
ඇස රතු කල කාරණාව
 නොම දන්නී

පොඩි කරන්න එපා දෑස
තව පෑරේවී
කඳුළු එක්ක ඔබ හඬනා
 දිය වී යාවී

නොපෙනෙන ඇස රිදවූ දේ 
සොයාම වෙහෙසී
නිදාන  එය ඇසේම 
නිදන්ව ඉද්දී

කඳුළු මිඳුණු දෙකොපුල්
 හීනෙන් හිනැහෙද්දී
තිබුණා රොඩ්ඩක් ඔය නෙතු
කෙවෙනියෙහි රැඳී

ඉවත ගිය පසුද එය ඇස 
හැරදා පැරදී
දැනේවි බෝ කල් කිසිවක්
ඇති සේ ඇසෙහී

Monday, September 19, 2011

පුළුන්

source

පාවෙන සැහල්ලුව පොඩි සුළඟටත් හැමූ
හැකිලෙන දිගහැරෙන හරි පහසුවෙන් මුදු
ඵලයෙන් මිදෙන විට පිරිසිඳු සුදුම සුදු
වාගේ නොවෙද හිත අපගේ පුළුන් කපූ

සායම් කහට නෙක නෙක විසිතුරු පාට
සෝදාලන්න උගහට ගෑවුණු දාට
වාගේ තණ්හාව දැවටෙන හිත අවට
නෙක පාට ගා හිත අවලස්සන කරන

ගිනි පුපුරකට හසුවී දැවෙනා දාක
සුළඟයි සුලබ නෑ වැසි නිවනා දාහ
වෛරී ගින්න සිත් මල දවනා විටෙක
සෙවණක් වටි සුළඟින් සැඟවී ඉන්න

Thursday, September 15, 2011

චූං පාං

source

                                                     උදේ හය හමාරට හතරට                හවස
                                                     හොඳට නින්ද යන වෙලාවල්        දෙකට
                                                     එන්ජිම සද්ද කර ගව් ගානක්            දුරට
                                                     එනවා නළා පිඹගෙන කන්නට     
දෙන්ට
                                                  

                                                     බයිසිකලේ පැද එන අයියට          වැඩිය
                                                     රෝස් පාං රුපියල් දෙකකුත්         වැඩිය
                                                     අනිත් ඒව  හැටි වෙනසක්         නැතිය
                                                     පෙට්රල් ගනං හින්දා වන්නට       ඇතිය
                                                  

                                                    මේවා කියන්නේ තරහට නොවෙ    හරිය
                                                    උඹෙ අත වීරියෙන් පවුලක් ගොඩ  ඇතිය
                                                    කට කහනවට කිව්වට මේ සිව්         පදය
                                                    බේකරියක් ගන්ට උඹටත් කල්       ඇතිය



Friday, September 9, 2011

ගල් බංකුව

source


                                                           මේ මිටියාවත මැද තනියේ
                                                           ගල් බංකුව ඔබ මඳ පවනේ
                                                           සඟවාගෙන අපි ගැන මතකේ
                                                           
සිටිනා හැටි නිහඬව දුකසේ

                                                           පුළුලුකුළේ සුවබර යහනේ
                                                           සැතපූ සිනහව හද රැව්දේ
                                                           සඳ එළිය වැහෙන්නට ඇයගේ
                                                           කෙහෙ රැල්ල මිදූ හැටි සිහිවේ
                                                           

                                                           ගල් බංකුව උඩ තුරු සෙවණේ
                                                           තනි වෙන්නට සඳ නැඟ එන්න ...                                                           

                                                           
                                                           හදට ළඟින් ළය මඬලේ                                                            
                                                           හිස තියාන සැන්දෑ අඳුරේ
                                                           ඉකි බින්ඳ හඬේ අනුනාදේ
                                                           මට තාම ඇසේ හද ගැස්මේ
                                                           

                                                           ගල් බංකුව උඩ තුරු සෙවණේ
                                                           තනි වෙන්නට සඳ නැඟ එන්න ... 


Saturday, September 3, 2011

ඔච්චමට

source

පමා වී අවදිව
කලියෙන් රතු ඉරට
හති වැටී හනිකට
හැල්මෙ දිව යන මඟට

රුදු සපුන් මුව සාවුන්ට
දිලිසෙන දෑස් මානන
සුසුමත් ඇසෙන තරමට
නිහඬ දඩ බිමට

සසර හුරුවට හමුව
දොඩමළු වු දෑසක
අනිමිසය බිඳිමින්
අමතක වු වටපිටාවට

පැද්දි පැද්දී හෙමිහිට
නටුවෙන් ගිලිහිලා සුළඟට
ඔච්චමට වාගේ වැටෙන
වේලිච්ච කොළ

Related Posts Plugin for WordPress, Blogger...