Sunday, July 31, 2011

සෙයිලම

source
                                               
                                               ගහ කොළ සිප හමා එන මල් සුවඳ             මුදු
                                               වෙනුවට ළය සුසුම් වී ඇත හුරු                පුරුදු
                                               දූවිලි මුසුව එන පසු කර ගඩොල්                කඳු                                            
                                               ගිනියම් මඳ නලට විලවුන් පහස                 ලදු

                                               කටවල් යකඩ යදියන් තරඟෙට              ගයන
                                               ගී පැණි මී පුරාලයි දෙසවන්                    බඳුන
                                               හඬ නෑසුණත් අඳුරේ බටලී                     වයන
                                               රෑ නින්දෙදිත් නැහැ තනිවන්නේ           සවන


                                               වෙරළත රැළි නටයි පොඩි උන්      කැන්දාන
                                               පෙර උන් මා පියන් අත් වැල් බැඳ          ඇදුන
                                               සිනමා තිරෙක ඇඳෙනා දකිනා             සිහින
                                               දැනෙනා සුවඳ නානා  මසවුළු               පිසින


                                               විදුලිය එළිය දෑසම කරනා                     එකලු
                                               ගමනින් බළල් යනෙනා  ලිය          දැකුම්කළු
                                               සැන්දෑ අඳුර විත් වැසුවත් ගම                  කවුළු
                                               රෑටත් ලොවක මෙහි යළි හිරු            පායයිලු


Friday, July 22, 2011

වීරයා

source

සොඳුරු මිටියාවත
නොම දවා ගින්නෙන්
හිඳිනා නිසොල්මන්ව
ෆුජියාමා  කන්ද

විස ඇත්ත සඟවා
සිනාසෙන අයෙක් මෙනි
ලෙස රක්ත ලාවා
හද කෑ ගසද්දිත්

කන්ද ඇසුවා ගඟෙන්
ගලන පහළින් සෙමින්
වීරයෙක් වේද මං
පුපුරා  ගියෝතින්

Saturday, July 16, 2011

කඳුළ

source

ඈත
 වසන්තෙක මුව ගෑ
කුළුඳුල් පෙම් රස
ඔබට දනෙනවද කියන්න
මගේ දෙතොල් වල

මතකේ හමනා ඉඳහිට
සුවඳ අතීතෙක
ඔබට දැනෙනවද කියන්න
මගේ සුසුම් වල

ඒ රසයත් සුවඳත් ඔබෙ
නෙතඟට එක් කල
ඉඩ දෙනවද පිසදමන්න
නොරිදා කඳුළට

Thursday, July 14, 2011

සංසිඳීම

source

මැදින් කතරෙක 
දුකින් යන විට
නොසිතු ලෙස කෙම් 
බිමක් හමු විණ

වැඩුණු සරුවට 
මහා වෘක්ෂෙකි
අතට නුදුරින් 
පැසුණු ඵලයෙකි

පිරූ මුත් කුස
යන්ට හිත නැත
ඉහල අත්තක 
ඉදුණු ඵල දැක

බොජුන් දිවමන් 
සදිසි ඒ ඵල
නැඟී තුරු මත 
බැලීයෙමි රස

පෙනේ අත්තක 
අගට වන්නට 
බැඳුණු මීයක්
රසය වෑහෙන

විසැති මී මැසි 
සෙනඟ ගැවසෙන
නොසවි අතු අග
කරමි තරණය ?

`මම නැවතී සිටිමි. ඔබත් නවතින්න`
~ බුදුරජාණන් වහන්සේ විසින් අංගුලිමාලට

Thursday, July 7, 2011

මතක

source

පුංචි ඇස් නුඹගේ කිඳුරී
පෙරළි කල වරලස කැරළී
වචන වී ගීයක් මිහිරී
ඇසේ තාමත් මට සොඳුරී

ළඟම ඉන්නට කී සුරලී
ඇයිද අද තනිවම වැළලී
ගින්න හද පතුලේ ඇවිලී
ගොසින් අද කඳුළුත් වියලී

ගමන මතකයි අපි ආපු
හීන සිහිවෙයි අපි මවපු
රෑක සඳ නැති අපි දැකපු
තරුව තාමත් තනිවමලු


Saturday, July 2, 2011

රථාචාරී

source


                                                     සුක්කානමකි ලබනා දෑතේ පහස
                                                     රත්වූ එංජිමකි ගත උණුසුම දෙවන
                                                     දවසේ වැඩි හරිය  සමඟින් ගෙවන
                                                     මැණිකේ දුකයිදෝ මා හා  එකට


                                                     යන්නේ නැතුවාම ගොඩ වුණු විගසින්ම
                                                     අම්මා මගේ සිහිකරලා බැන්නාට
                                                     උන්දෑ පින්දේය කන බත් අහුරක් ගාන
                                                     දන්නේ නැතුවාට ඔබ කළුදැයි සුදුද


                                                     ඉඳ හිට දුවන්නේ සැර කර එංජිමට
                                                     අල්ලන්නට නොවේ හඳ අහසේ තියෙන
                                                     වීරිය කරන්නේ රෑ දාවල් නැතුව
                                                     
පුතුගේ උරුමෙ සුක්කානම නොම වෙන්න

Related Posts Plugin for WordPress, Blogger...