හැඩතල

image-from

                                                      
                                                      ඉරක් සුදු පාට සෘජු ඉරක්
                                                      මාවතේ ඇඳලාද අලුතෙන් ඉරක්
                                                      නැහැ එ පැරණියි නුදුටුවේ ඇයි මෙතෙක්
                                                      පැමිණ ඇත්තේ ඉර මතින් බෝ කලක්

                                                      ජීවිතේ හැඩ කරයි හැඩතල       ගොඩක්
                                                      බොහෝ හැඩතල මායිමේ සෘජු     ඉරක්
                                                      මකා රවුමට අඳින්නට               පාදයක්
                                                      සිතේ එනමුදු වක් උනත් එය         ඉරක්

                                                      ඉරි නොමැති නිල් අහස වගෙ   නිදහසක්
                                                      තියේවිද ලොව පිරුණු හැඩතල     රැසක්
                                                      සැදෙයි නොදැනිම එහැඩ මැද   මායිමක්
                                                      නොදන්නා හැඩයක්, නිසා ඉරි  ගොඩක්

දර

image-from

                                                සුද්දො වැඩි වනේ සිරි නරඹන්න පරිසරේ
                                                අපට බත් දෙන්න අප්පා දරට ගියෙ මගේ
                                                පොළව ඉරි තලන ඉර ගිනි බිඳින කූටකේ
                                                හෙළන දහඩියෙන් නුඹේ මල් සුවඳ වෙයි වනේ

                                                අජානේය රථ සවාරි යයි හැටට හැටේ
                                                නුඹේ හිත හයිය දැකලා මහ ගසුත් නැවේ
                                                උසට මිටි බැඳන් දර මහ ගොඩක් සයිකලේ
                                                වාරු නැති උනත් අත් වාරුව නුඹයි අපේ

                                                සත්තු මඟ බහින හැන්දෑ අඳුර එන වෙලේ
                                                අපේ පැල තාම අඳුරුයි පහන මඟ කැලේ
                                                දෙයියො වැඩ ඉන්න වනයට අරක් ගෙන අනේ
                                                අන්තරා නොකර අප්පා රැකදෙන්න අපේ

හිම

image-from

මල් පිපී නැතත් මේ රෑ ගුවන් තොටුපලේ

සුවඳ දැනෙනවා සෙනෙහේ හිම කුමාරියේ

සිංදු කී ඔබේ සිංහල නුහුරු තොල් පෙතී 

නිහඬ කිමද දෑසේ ඇයි කඳුළු බිඳු නැඟී

මගෙන් මඟ ඇසූ මා හට පෙමට මඟ කියූ

ඔබේ සුරත සීතයි මං අරන් ඇවිදපූ

අපි ඇවිද ආ මඟේ මා යළි යා යුතුව තිබේ

ඔබ මෙන් නැතත් තවත් මඟියෙක් මා බලා හිඳී

ඔබ පැමිණි ලොව බලා පියඹා යන්න පරවියේ

ඔබට හුරු පුරුදු සීතල එහිය මෙහි නැතී

ලක වැනුම

image-from

                                            රන්වන් පැහැය ගත්ත වැල්ලෙන් වටයි රටක්
                                                               මුතු ඇටයකී සයුරෙ දිලෙනා
                                            වන්නම් රබන් පදත් සීපද නැටුම් කවිත්
                                                               තාලෙට ඇසෙන එහඬ අගනා
                                            පීදෙන ගොයම් කරල් වෑ දිය පිටින් පෙනෙන
                                                               සීතල සුළං රොදට සැලෙනා
                                            තේජස අහස සිඹින දාගැබ් උසට සුදට
                                                               සීගිරි මැදුරු පුදුම හිතෙනා

                                            තෙවරක් බුදුන් වැඩිය පින්බිම මෙයයි මිහිරි
                                                               ඝණ්ඨා නදින් සිතම පිරෙනා
                                            අමිලවු මැණික් නිදන් ගතවී තිබෙන පොළව
                                                               වන රොදය නිතර වැසි වසිනා
                                            කන්දෙන් සුසැදි මිහිරි දල්ලෙන් තැනෙන තේ
                                                               පානය වනයි පවා එතෙරා
                                            සෙල්ලම් වලින් ඔට්ටු වෙන්නට බයයි ලොවම
                                                               විස්කම් හපන් ගැටව් ඇතුවා

                                            මනරම් දසුන් මවන ඇල්ලෙන් දියෙන් පිරුණ
                                                               ගංගා මෙදිවයිනෙහි බෝමා
                                            දළදා හිසින් ඇතුගේ වඩනා අලංකාර
                                                               පෙරහැර කරන නුවර සොබනා
                                            නෙක සිරිත් හුරු පිරිස් සතුටින් එකා වන්ව
                                                               මහනෙලක පෙති වගේ ඉන්නා
                                            එඩිතර පුතුන් වීර පණ නල පුදා රැක්ක
                                                               දෙරණයි උතුම් මෙ ශ්‍රී ලංකා