කුසුම

source

සුදු පිච්ච මලක

සිරියයි මුහුණ

රේණු පොකුරක

සුවඳයි වචන

උසත් නැති ගහක

අතු බිමට නැමුණ

අත පොවන දුරක 

හිනැහෙන කුසුම

මාවතක් මතක 

තබා ගත නොහෙන

ස්වප්න උයනක 

සුපිපුණේ කිමද ? 

මේ වගේ

කිසිදා නෑ දැනී මේ වගේ ආදරේ
ඔබ මගේ ළඟ නැතී දුක දැනේ අද දිනේ
වෙන් වෙලා ගිය පසුයි තේරුණේ කුමරියේ 
ඔබ කෙරේ හද සෙනේ වාගෙ බැව් සාගරේ

සීත රෑ නින්ද නෑ හද දවයි ආදරේ
පාළු වූ විජිතයේ තනිකමයි රජවුනේ
මධු විතින් නොම බිඳේ තනිය මා හදවතේ
සුළං රැල් ඔබ ගැනයි මුමුණමින් හමන්නේ

ලිව්වේ December, 2006
හඬ Sam Samarakoon

ගුරු අම්මා

source

අපෙ ගම්මානෙ දුෂ්කර පිටිසර හින්දා
පාසැල් එන්නෙ එහෙමත් ළමයෙක් හන්දා
උනුත් කුඹුරු වැඩ දවසට නැති හන්දා
ගුරුවරු නේන එක මෙහි හරිදෝ මන්දා

මේ දුක් ගැහට දැක දැක අප ගැන පෙම්මා
ඉස්කෝලෙම ඉන්න අපගේ ගුරු අම්මා
පෑහෙන්නට නොදී අම්බරුවන් එක්කා
සිප් කිරි පොවයි අපගේ හිස් හිස් අතගා

හිතමින් ඉන්න හැටි නගරෙට පැන ගන්නා
පුහුදුන් අපි මඩේ ඔබ නෙළුමයි පිපිලා
දල්වන නැණ පහන් අපගේ ඇස් පාදා
අම්මා බුදු වෙන්න ඔබ අග සවු වේවා !