චූං පාං

source

                                                     උදේ හය හමාරට හතරට                හවස
                                                     හොඳට නින්ද යන වෙලාවල්        දෙකට
                                                     එන්ජිම සද්ද කර ගව් ගානක්            දුරට
                                                     එනවා නළා පිඹගෙන කන්නට     දෙන්ට
                                                  
                                                     බයිසිකලේ පැද එන අයියට          වැඩිය
                                                     රෝස් පාං රුපියල් දෙකකුත්         වැඩිය
                                                     අනිත් ඒව ඒ හැටි වෙනසක්         නැතිය
                                                     පෙට්රල් ගනං හින්දා වන්නට       ඇතිය
                                                  
                                                    මේවා කියන්නේ තරහට නොවෙ    හරිය
                                                    උඹෙ අත වීරියෙන් පවුලක් ගොඩ  ඇතිය
                                                    කට කහනවට කිව්වට මේ සිව්         පදය
                                                    බේකරියක් ගන්ට උඹටත් කල්       ඇතිය

ගල් බංකුව

source

                                                           මේ මිටියාවත මැද තනියේ
                                                           ගල් බංකුව ඔබ මඳ පවනේ
                                                           සඟවාගෙන අපි ගැන මතකේ
                                                           සිටිනා හැටි නිහඬව දුකසේ

                                                           පුළුලුකුළේ සුවබර යහනේ
                                                           සැතපූ සිනහව හද රැව්දේ
                                                           සඳ එළිය වැහෙන්නට ඇයගේ
                                                           කෙහෙ රැල්ල මිදූ හැටි සිහිවේ
                                                           
                                                           ගල් බංකුව උඩ තුරු සෙවණේ
                                                           තනි වෙන්නට සඳ නැඟ එන්න ...                                                           
                                                           
                                                           හදට ළඟින් ළය මඬලේ                                                            
                                                           හිස තියාන සැන්දෑ අඳුරේ
                                                           ඉකි බින්ඳ හඬේ අනුනාදේ
                                                           මට තාම ඇසේ හද ගැස්මේ
                                                           
                                                           ගල් බංකුව උඩ තුරු සෙවණේ
                                                           තනි වෙන්නට සඳ නැඟ එන්න ... 

ඔච්චමට

source

පමා වී අවදිව

කලියෙන් රතු ඉරට

හති වැටී හනිකට

හැල්මෙ දිව යන මඟට

රුදු සපුන් මුව සාවුන්ට

දිලිසෙන දෑස් මානන

සුසුමත් ඇසෙන තරමට

නිහඬ දඩ බිමට

සසර හුරුවට හමුව

දොඩමළු වු දෑසක

අනිමිසය බිඳිමින්

අමතක වු වටපිටාවට

පැද්දි පැද්දී හෙමිහිට

නටුවෙන් ගිලිහිලා සුළඟට

ඔච්චමට වාගේ වැටෙන

වේලිච්ච කොළ