නැඟණියනි

source

සේපාලිකා මල් හැලිලා මග දිගට
පාසැල් යන නුඹට පෑගෙනවා පයට
ආවත් එවන් බාදා නුඹ දිවි මඟට
සේපාලිකා මල මෙන් වීයන් සුවඳ

තවරා සුවඳ පළඳා අබරණ නේක
නටලා නාඩගම් මවුපියො නැති ගාන
ඉන්නා එකියලා මවනා සුර ලෝක
නැතුවට නුඹ හැඩයි හරියට සඳ ගාන

පවසා කවට බස් නෙක නෙක නරි වාද
එවලා හසුන් පත් පිට පිට පෙම් පාට
ගන්නට නුඹේ හිත එන උන් මනමාල
නොතකන් නඟේ හරි නුඹ ඔය යන පාර

අම්මා සඳයි පියතුම දිනකර දාට
ඒ ඉර හඳේ එළියයි නුඹ මගෙ ලොවට
පතුරා සොමි ගුණය මවුගේ දායාද
හිනැහී ඉන්න පිහිටයි දළදා නුඹට

අද

source

අතීතයේ පැසවා 

විසවූ වණය

රිදුණත් පතා කැසුවා

මොහොතක සුවය

දිවා රැයේ මැව්වා 

මිහිරැති සිහින

අනාගතේ වින්දා 

එන්නත් පෙරම

මනසේ දොර අරා

ඊයේ සහ හෙටය

අද ගෙවෙනවා

ඒ කාටත් රහසේය

බුදු හිමි ලොව්තුරා

දෙසුමුත් මේ දහම

මවනව කසනවා 

අපි තව පුහුදුන්ය

ගමන

source

මුව හසරැලි හඬවා

කඳුලැලි ලං කරලා

මා ඔබ හැර යනවා

සිත සැනසුම සොයලා

රඳවා සිරගත කල මා

ඔබ හද සිර ගෙය අද නෑ

නවතා ලූ පියවර මා

පෙම් දම්වැල් කිසිවක් නෑ

සඳ නැති තරු මඟ කියනා

මාවත තනිවම යනවා

සීතල සුළඟක් වැදිලා

ඉනු කඳුලැලි වියලෙනවා